‘लकडाउन’को फाईदा उठाउदै बढी मुल्यमा सामान बेचेपछि भाटभटेनीलाई ३ लाख जरिवाना

काठमाडौं, सर्वसाधारणको पसलहरुमा लकडाउन लगाएर बन्द गराएपनि निर्धक्क चलिरहेको भाटभटेनी सुपर मार्केटले बढी मुल्यमा सामान बेचेपछि आज ३ लाख जरिवना लगाईएको छ । दैनिक उपभोग्य सामानमा अधिकतम बिक्री मुल्य भन्दा बढी मूल्य लिएको पाइएपछि भाटभटेनी सुपरमार्केट ३ लाख जरिवानामा परेको हो । वाणिज्य, आपूर्ति तथा उपभोक्ता संरक्षण विभाग विभागको टोलीले आज गरेको अनुगमनका क्रममा टङ्गालस्थित भाटभटेनी सुपरमार्केटले उपभोग्य वस्तु ‘एमआरपी’ भन्दा बढी मूल्य लिई बिक्री गरेको पाइएपछि जरिवाना गरेको जनाएको छ ।
उपभोक्ता संरक्षण ऐन, २०७५ अनुसार भाटभटेनीलाई उक्त रकम जरिवाना गरिएको विभागले बताएको छ ।
लकडाउनको समयमा सरकारले साना ब्यवसायीहरुलाई ब्यवसाय संचालन गर्न रोक लगाए पनि नागरिकलाई उपभोग्य वस्तुको खरिदमा सहजीकरण गर्न भन्दै भाटभटेनीलाई देशै भर संचालन गर्न अनुमती दिएको छ । भाटभटेनीका पसलहरुमा सामाजिक दुरी कायम नगरेको, टोलमा भिड लगाएको तथा पसलकै स्टाफहरुलाई आवश्यक सुरक्षा प्रबन्ध नमिलाएको भन्दै पसल वरपरका स्थानीयबासीले आलोचना गर्दै आएका छन् । विपद्को अवस्थामा उपभोक्ता ठगिने भन्दै विभागले लकडाउनको समयमा पनि बजार अनुगमनलाई तीव्रता दिएको छ ।