बुटवल । बुटवल उपमहानगरपालिकाका प्रमुख शिवराज सुवेदीले कोभिड—१९ को महामारी विरुद्ध विजयी बन्न सक्नेमा ढुक्क भएको बताउनुभएको छ ।
गणतन्त्र दिवसको उपलक्ष्यमा शुभकामना सन्देश दिनुहुँदै नगरप्रमुख सुवेदीले नागरिकको दैनिक जीवन असहज बनाएको महामारीविरुद्ध तीनै तहका सरकार केन्द्रित रहेको अवस्थामा नागरिकको चासो र सजगताबाट जित्न त्यसलाई सकिन्छ भन्नेमा ढुक्क भएको बताउनुभएको हो ।
सुवेदीले महामारी विरुद्धको संघर्षलाई प्रभावकारी र सफल बनाउन सकियोस् र जनजीवन सामान्य बनाउन सकियोस् भन्ने कामना गर्नुभएको छ ।
शुभकामना सन्देशमा सुवेदीले राष्ट्रिय एकता, सद्भाव र सहिष्णुता, सबल आर्थिक केन्द्र समुन्नत बुटवलका माध्यमबाट समृद्ध बुटवल खुशी बुटवलबासीको संकल्प साकार पार्न सकियोस् भन्नेसमेत कामना गर्नुभएको छ ।
‘गणतन्त्र स्थापनाले सार्वभौमसत्ता पूर्णतःनागरिकमा स्थापित गरेको छ । संघीय लोकतान्त्रिक गणतन्त्रात्मक शासनब्यवस्थाको माध्यमद्वारा दिगो शान्ति, सुशासन र समृद्ध राष्ट्र निर्माणमा एकताबद्ध भई अघि बढ्न प्रेरणा प्रदान गर्न सकोस् भन्ने कामना गर्दछु ।’
नगरप्रमुख सुवेदीले कम्युनिष्ट आन्दोलन, लोकतान्त्रिक आन्दोलनका क्रममा घाईते र वेपत्ता योद्धाहरुप्रति हार्दिक सम्मान समेत व्यक्त गर्नुभएको छ ।
प्रतिक्रिया