म्याग्दी । म्याग्दीमा कोरोना भाइरसको पहिलो संक्रमित फेला परेका छन् ।
गत जेठ ९ गते भारतबाट सुनौली नाका भएर आएका मालिका गाउँपालिकाका ३० बर्षिय युवामा कोरोना भाइरसको संक्रमण पुष्टि भएको हो ।
पोखराको स्वास्थ्य बिज्ञान प्रयोगशालामा गरिएको स्वाब पीसीआर परीक्षणमा कोरोना पोजेटिभ पुष्टि भएसंगै उनलाई बेनी अस्पतालको आइसोलेशनमा ल्याईएको अस्पताल विकास समितिका अध्यक्ष बेलबहादुर कटुवालले जानकारी दिनुभयो ।
बेनीको न्यु वेष्ट प्वाइन्ट क्वारेनटाइनमा रहँदै आएका संक्रमित युवालाई बेनी अस्पतालको आइसोलेसनमा सारिएको छ । उनको स्वास्थ्य अबस्था सामान्य रहेको छ ।
म्याग्दीमा भारतबाट आएकाहरुलाई बेनीको वेष्ट प्वाइन्ट र म्याग्दी बहुमुखी क्याम्पसको क्वारेनटाइनमा राखिएको छ ।
उनीहरुमध्ये बुधवार १४ जना र विहिवार २९ जनाको स्वाब परिक्षणको लागि पठाईएको छ ।
कोरोना नियन्त्रण तथा रोकथाम कार्यक्रमका प्रवक्ता तथा स्वास्थ्य निर्देशनालयका निर्देशक डा. विनोद विन्दु शमाले जारी गरेको विज्ञप्ती अनुसार, म्याग्दीमा पहिलो संक्रमित पुष्टि भएसंगै गण्डकी प्रदेशमा कोरोना संक्रमितको सख्ंया १७ पुगेको छ ।
म्याग्दीमा भारतबाट आएका ८९ जना र दुई जना चालक सहित ९१ जनालाई क्वारेनटाइनमा राखिएको कोभिड १९ कमाण्ड पोष्टका सदस्य सुरत केसीले जानकारी दिए ।
प्रतिक्रिया