काठमाडौं । नेपाली सेनाको समरी जनरल सैनिक अदालतबाट सम्पत्ति र अनुशासन तथा आचरण सम्बन्धी कसूर गरेको अभियोगमा एक जना अवकाश प्राप्त पाइलट उपरथीलाई नसिहत तथा रकम असुल उपर सहित ८ जना सैनिक अधिकृतहरुलाई कारवाही गरेको छ । सैनीक अदालतले १ जना अधिकृत तथा ९ जना अन्य दर्जाहरुलाई भने सफाई दिएको छ ।
सैनिक हवाई महानिर्देशनालय, गौचरमा कार्यरत रहँदा अनियमितता गरेको अभियोगमा पाइलट उपरथी सुधिर श्रेष्ठ (अवकाश प्राप्त) सहित १९ जना बिरुद्ध अनुशासन तथा आचरण सम्बन्धी कसूर गरेको मुद्दा चलाइएको थियो । नेपाली सेनाले सैनिक हवाई महानिर्देशनालयमा विभिन्न किसिमका कमि कमजोरी भएको भन्ने सम्बन्धमा सत्यतथ्य छानबिन गर्न रथीको अध्यक्षतामा कोर्ट अफ इन्क्वायरी बोर्डको गठन गरेको थियो । बोर्डको प्रतिबेदनको आधारमा सैनिक अदालतले फैसला गरेको नेपाली सेनाले विज्ञप्तिमार्फत जानकारी दिएको छ ।
सैनिक अदालतले तत्कालिन सैनिक हवाई महानिर्देशक पाईलट उपरथी श्रेष्ठ महानिर्देशक रहेको अवधिमा ओहदा अनुसार दायित्व पुरा नगरेको भन्दै नगद ५८लाख ९५ हजार ५९०रुपैयाँ असुल गर्नुका साथै नसिहत दिने फैसला गरेको छ । अदालतले सोही मुद्धामा अन्य ८ जना अधिकृतहरुले आफूलाई प्राप्त जिम्मेवारीलाई प्रभावकारी रुपमा सम्पादन नगरेको ठहर गरि सचेत गराउने गरी फैसला गरेको सेनाको बिज्ञप्तिमा उल्लेख छ ।
१ जना अधिकृत र अन्यदर्जा ९ जनालाई भने सैनिक अदालतले सफाई दिने फैसला गरेको छ ।
विज्ञप्तिमा नेपाली सेनाले पद्दती र प्रणालीमा आधारित संगठन सन्चालनमा जोड दिंदै पारदर्शिता र जवाफदेहिता कायम गर्ने तथा दण्डहीनताको अन्त्य गर्ने लक्ष्य अनुसार अनुशासन र आचरण विपरित कार्य गर्नेहरुलाई कारवाही गरिएको जनाएको छ ।
प्रतिक्रिया