‘हामीले कसैलाई अपहरण गरेका छैनौं’, मानवअधिकार आयोगमा सांसद बस्नेत र श्रेष्ठको निवेदन

काठमाडौं । समाजवादी पार्टीका सांसद डा. सुरेन्द्र यादव अपहरणको आरोप लागेका सांसद महेश बस्नेत र कृष्णकुमार श्रेष्ठ (किसान) र पूर्वप्रहरी महानिरीक्षक सर्वेन्द्र खनालले आफूहरुले कसैलाई अपहरण नगरेको भन्दै राष्ट्रिय मानव अधिकार आयोगमा उजुरी दिनुभएको छ ।

सोमबार आयोगको कार्यालय पुगरे उहाँहरुले समाजवादी पार्टी (हाल जनता समाजवादी पार्टी )का सांसद यादवको अपहरण नगरेको प्रष्टिकरण बुझाउँदै आपुहरुहरु निर्दोष रहेको जिकिर गर्नुभएको हो ।

यसअघि डा. यादवले आफुलाई सांसदहरु बस्नेत र श्रेष्ठ तथा पूर्व आईजीपी खनालले अपहरण गरेको भन्दै आफ्नो मानव अधिकार रक्षा को माग गर्दै डा. यादवले वैशाख १८ गते आयोगमा उजुरी दिनुभएको थियो ।
जनकपुरस्थित घरमा रहनुभएका यादव बस्नेत, श्रेष्ठ र खनालसहित गत बैशाख १० गते मध्यराती काठमाडौं आउनुभएको थियो ।

आफ्नो पार्टी फुटाल्न सांसद यादवको अपहरण भएको तत्कालिन समाजवादी पार्टीले आरोप लगाएको थियो । तर, यादवले भने कहिले प्रधानमन्त्रीले बोलाएर काठमाडौं आएको, कहिले त्यसै जवरजस्ती गरेको, कहिले आफै आएको भन्दै अलगअलग बयान दिँदै आउनुभएको छ ।