कपिलवस्तु । कोरोना भाइरसका संक्रमित बढ्दै गएपछि जेठ ५ सम्म कपिलवस्तु जिल्लालाई सिल गरिएको छ ।
जिल्ला सुरक्षा समितिको सोमबार बसेको वैठकले आजै साँझ ५ बजेबाट जिल्लालाई सिल गर्ने निर्णय गरेको हो । लकडाउनकै बीचमा भारतबाट लुकिछपी आउने क्रम बढेको र क्वारेन्टाइनमै बसेकाहरुमा कोरोनाको संक्रमण देखिएपछि जिल्लालाई पूर्ण सिल गर्ने निर्णय गरिएको छ । सोमबार मात्र यशोधरा गाउँपालिकामा ८ जना र बुद्धभूमि नगरपालिकामा २ गरी १० जना कोरोना संक्रमित भेटिएका छन् ।
संक्रमितको संख्या बढ्न थालेपछि थप सर्तकता अपनाउँदै सिल गर्ने निर्णय भएको प्रमुख जिल्ला अधिकारी दिर्घनारायण पौडेलले जानकारी दिनुभयो । कपिलवस्तुको नेपाल भारत सीमा नाकामा २१ सयभन्दा बढी नेपाली जम्मा भएका छन् । कपिलवस्तुमा सोमबारसम्म कोरोना संक्रमितको संख्या १५ पुगेको छ ।
सुरक्षा समितिले पूर्वपश्चिम राजमार्गमा आवतजावत गर्ने अत्यावश्यक खाद्यान्नका मालवाहक, दुधका ट्यांकर, एम्बुलेन्स लगायतका साधनहरुलाई जिल्लामा नरोकिकन आवत जावत गर्न भने दिनेभएको छ । तरकारी तथा खाद्यान्न किनमेलका लागि विहान ७ बजेदेखि ९ बजेसम्म समय छुट्याइएको छ ।
स्थानीय प्रशासन ऐन २०२८ को ६९३० क र संक्रामक रोग ऐन दफा २० बमोजिम जिल्लाभित्र साधन सवारी, उद्योग, निर्माण कार्यमा पूर्ण रोक लगाइएको जिल्ला प्रशासन कार्यालयले जारी गरेको विज्ञप्तिमा जनाइएको छ ।
प्रतिक्रिया