कालापानीबाट भारतीय सेना हटाउन सरकारलाई संसदीय समितिको निर्देशन

काठमाडौं । संंसदीय समितिले सरकारलाई कालापानी क्षेत्रमा रहेका भारतीय सुरक्षाकर्मी हटाउन निर्देशन दिएको छ ।

प्रतिनिधिसभाको अन्तर्राष्ट्रिय सम्बन्ध समितिको आइतबार र सोमबार बसेको बैठकले नेपाली भूमि अतिक्रमण गरेर बसेको भारतीय सेनालाई तत्काल हटाउन पहल गर्न सरकारलाई निर्देशन दिएको हो ।

नेपाली भूमिमा अतिक्रमण गरी भारतले सडक निर्माण गर्नु अन्तराष्ट्रिय कानुन, दुई देशबीचका विद्यमान सन्धी सभ्झौता, सहमति र असल छिमेकीसम्बन्धी मान्यताभन्दा विपरित भएको समितिको ठहर छ ।

‘भारतद्वारा अतिक्रमित भूमिबाट भारतीय सुरक्षाकर्मीलाई यथाशीघ्र हटाउन, लिम्पियाधुरा, लिपुलेक कालापानी लगायत क्षेत्रमा नेपालको सुरक्षा र प्रशासनिक उपस्थिति कायम गर्न उच्चतहबाट राजनीतिक, कुटनीतिक र अन्य आवश्यक कार्य गर्न नेपाल सरकारलाई निर्देशन दिने’ समितिको निर्णयमा भनिएको छ ।