काठमाडौं । नेपाल कम्युनिष्ट पार्टी एमालेका महासचिव शङ्कर पोखरेलले सत्तापक्षले आफ्नै कार्यकर्तालाई आन्दोलनमा उतारेर हिंसा मच्चाउने र त्यसको दोष विपक्षी दलमाथि थोपर्ने प्रयास गरेको आरोप लगाएका छन् । महासचिव पोखरेलले सोमबार सामाजिक सञ्जाल फेसबुकमार्फत सत्तापक्षको पछिल्लो रणनीतिप्रति टिप्पणी गर्दै यस्तो आरोप लगाएका हुन् ।
उनले आफ्नै कार्यकर्तालाई आन्दोलनकारीका रूपमा प्रस्तुत गर्ने, तिनैसँग वार्ता गरी सम्झौता गर्ने र हिंसाको जिम्मेवारी भने विपक्षीमाथि थोपर्ने प्रवृत्तिको आलोचना गरेका छन् ।
पोखरेलले फेसबुकमा लेखेका छन्, “आफ्नै कार्यकर्तालाई आन्दोलनकारी बनाउने, तिनैसँग वार्ता गरेर सम्झौता गर्ने, अनि हिंसाको दोष चाहिँ अरूमाथि थोपर्ने यो जुक्ति गजबको छैन त ?”
पछिल्लो समय देशका विभिन्न स्थानमा भएका आन्दोलन, झडप तथा सरकार र आन्दोलनकारीबीच भएका सम्झौताप्रति संकेत गर्दै उनले सत्तासीन पक्षले योजनाबद्ध रूपमा परिस्थिति भड्काएर त्यसको राजनीतिक जिम्मेवारी विपक्षी दलमाथि थोपर्न खोजेको आरोपसमेत लगाएका छन् ।
प्रतिक्रिया