प्रेस पासलाई टेरेन कोरोना भाइरसले, जनकपुरका पत्रकार पनि संक्रमित भेटिए

जनकपुरधाम । सरकारले पिसिआर परिक्षणको गति बढाएसंगै कोरोना भाइरस संक्रमितहरुको संख्यापनि थपिंदै गएको छ । समुदायको चरणमा प्रवेश गरेको भाइरसको संक्रमणले पछिल्लो समय भने सञ्चाकर्मीहरुलाई आक्रमण सुरु गरेको छ । वीरगन्जमा दुई जना पत्रकारमा संक्रमण पुष्टि भएको अर्को दिन जनकपुरधामका अर्का पत्रकारलाई पनि संक्रमण पुष्टि भएको छ ।

धनुषाका प्रमुख जिल्ला अधिकारी कोषहरि निरौलाले ४० वर्षीय पत्रकारमा कोरोना संक्रमण पुष्टि भएको जानकारी दिनुभएको छ ।

४० वर्षीय पत्रकारसँगै जनकपुरधामका एक जना पुस्तक व्यवसायी पनि संक्रमित भेटिएको बताईएको छ । ती दुवै जनालाई प्रादेशिक अस्पतालको आइसोलेसनमा भर्ना गरिएको जिल्ला प्रशासन कार्यालयले जनाएको छ ।

संक्रमित पत्रकार पहिलेदेखि नै मुटुको बिरामी थिए । संक्रमित पत्रकारले आफू जनकपुरभन्दा बाहिर कतै नगएको तथा आफू कार्यरत संन्चार संस्थाको कार्यालय र पत्रकार महासंघको कार्यालयमात्र आउजाउ गर्ने गरेको बताएको प्रशासन श्रोतले बताएको छ ।

यसअघि मंगलबार वीरगञ्जका दुई जना पत्रकारलाई पनि कोरोना संक्रमण पुष्टि भएको थियो । वीरगञ्जका दुवै पत्रकारको नारायणी अस्पतालमा उपचार भइरहेको छ ।