चितवन । शुक्रबार बिहानै स्वास्थ्यमन्त्रालयले कोरोना भाइरसका ३० जना नयाँ संक्रमितको तथ्याङ्क अद्यावधिक गर्यो । ३० जना मध्ये चितवनको भरतपुर महानगरापालिका ६ केरसबाघका दुई जना बृद्ध दम्पती पनि रहेको जानकारी गरायो ।
यी दुवै जनाको ट्राभल हिस्ट्री भने हालैका दिनमा भारसतसँग जोडिएको देखिएको छ । कोरोना भाइरसको संक्रमण पुष्टि भएका ती दुई जना गत जेठ ३ गते मात्रै भारतको नयाँदिल्लीबाट चितवन फर्केको खुलेको छ ।
दिल्लीस्थित राजिव गान्धी क्यान्सर अस्पतालमा ७४ वर्षीय वृद्ध पुरुषको क्यान्सर उपचार गरेर घर फर्किएका थिए दुवै जना । तर फर्किँदै गर्दा उनीहरुसित कोरोना भाइरसको संक्रमण पनि सँगै आएको बुझिएको छ ।
उपचारपछि भारतीय एम्बुलेन्समा कृष्णनगर नाकासम्म आएका उनीहरु त्यसपछि नेपाली एम्बुलेन्समा घर आइपुगेका थिए ।
घरमा आएदेखि नै उनीहरु होम क्वारेन्टाइनमा बसेको भरतपुर–६ का वडाध्यक्ष हरिविलास कोइरालाले बताउनुभयो । भारतबाट आएकाले स्वाब परीक्षण गर्न पठाएको पोजेटिभ देखिएको भन्दै कोइरालाले उनीहरुले कसैलाई पनि भेटेको नपाइएको बताउनुभयो ।
आमाबाबुसँगै आएका छोराको स्वाब परीक्षण नतिजा भने नेगेटिभ आएको छ।
दुवै जना संक्रमितलाई शुक्रबार नै भरतपुर अस्पतालको आइसोलेसनमा भर्ना गरिएको छ।
प्रतिक्रिया