काठमाडौं । कर्णाली प्रदेशमा ३ जना संक्रमितसहित शनिबार अपरान्हसम्म कुल ३६ जना नयाँ संक्रमित थपिएका छन् । यससँगै देशभर कुल संक्रमितको संख्या ५८४ पुगेको छ ।
स्वास्थ्य तथा जनसंख्या मन्त्रालयका अनुसार कर्णाली प्रदेशको सुर्खेतमा गरिएको परीक्षणमा दुई पुरुष र १ महिला गरी ३ जनालाई संक्रमण पुष्टि भएको छ । कर्णालीमा यसअघि १ जनालाई संक्रमण देखिएको थियो ।
सेती अञ्चल अस्पतालमा गरिएको परीक्षणमा वैतडी शिवनाथ गाउँपालिकाका ४ जना व्यक्तिलाई कोरोना संक्रमण पुष्टि भएको छ ।
यस्तै राप्ती स्वास्थ्य विज्ञान प्रतिष्ठान दाङमा गरिएको परीक्षणमा बाँकेको नरैनापुर मदरसाका ६ जनालाई संक्रमण पुष्टि भएको छ भने नरैनापुरकै क्वारेन्टाइनमा रहेका २१ जना रहेको स्वास्थ्य तथा जनसंख्या मन्त्रालयका प्रवक्ता डा. बिकास देवकोटाले बताउनुभयो ।
बर्दिया बढैयातालका एक जनालाई पनि कोरोना संक्रमण पुष्टि भएको छ ।
यस्तै, कोशी प्रयोगशालामा गरिएको परीक्षणमा झापाको झापा गाउँपालिकास्थित डिल्लीराज मावि क्वारेन्टाइनमा रहेका ६ जनालाई पनि संक्रमण पुष्टि भएको डा. देवकोटाले जानकारी दिनुभयो ।
हालसम्म देशभर ५०५ पुरुष र ७९ महिला गरी ५८४ जनालाई कोरोनाको संक्रमण पुष्टि भएको मन्त्रालयले जनाएको छ ।
नयाँ संक्रमितहरुको कन्ट्याक्ट ट्रेसिङ सुरु भएको देवकोटाले बताउनुभयो ।
प्रतिक्रिया