बर्दिया । बर्दियाको गुलरिया नगरपालिका ७ को क्वारेन्टाइनमा बसेका एक जना पुरुषको मृत्यु भएको छ । सदरमुकाम स्थित बबई बहुमुखी क्याम्पसको क्वारेन्टाइनमा बस्दै आएका ५५ वर्षीय पुरुषको मृत्यु भएको हो ।
मजदुरीका लागि अछाम गएका उनी लगाएत १६ जना मंगलबार साँझ ६ दिन पैदल हिँडेर बर्दिया आएका थिए । गुलरिया नगरपालिका–९ गोडियनपुर बस्ने उनी मंगलबार साँझ ८ बजे बबई बहुमुखि क्याम्पसको क्वारेन्टाईन बसेका थिए । राती सुतेका उनी विहान उठाउँदा नउठेको उनका साथीहरुले बताएका छन् । विहान साढे ५ बजे अचेत अवस्थामा फेला परेका उनलाई ६ बजे स्वास्थ्यकर्मीले चेकजाँच गरी मृत्यु भएको पुष्टि गरेको गुलरिया नगरपालिकाका स्वास्थ्य शाखा प्रमुख सुनिल पाण्डेले बताए । उनी सँगै आएका १२ जनालाई बबई बहुमुखि क्याम्पसको क्वारेन्टाईनमा र ४ जनालाई कृष्णसार प्रावि खैरीको क्वारेन्टाईनमा राखिएको छ ।
उनको शव जिल्ला अस्पताल ल्याइ स्वाब संकलन गर्ने तयारी भइरहेको बताइएको छ । के कारणले मृत्यु भएको हो भन्ने बारे अनुसन्धान भइरहेको प्रमुख जिल्ला अधिकारी प्रेमलाल लामिछानेले बताए । उनी बसेको बबई क्याम्पसको क्वारेन्टाइनमा २९ जना रहेका छन् ।
हाल बर्दियामा २३ सय ६७ जना क्वारेन्टाइनमा रहेका छन् भने हालसम्म बर्दियाबाट स्वाव टेष्टका लागि पठाईएका मध्येमा ६ जना कोरोना पोजेटिभ देखिएको छ ।
प्रतिक्रिया