नेपालगन्ज । भारतबाट नेपालगन्जको जमुनाहा नाका भएर नेपाल आउनेहरुलाई आजदेखि जमुनाहा नाकामा तयारी खाना, पानी र मास्क वितरण शुरु गरिएको छ । ३० हजार जना सम्मलाई लक्षित गरि खाना पानी र मास्क वितरण गर्ने लक्ष्य रहेको सहयोगि संस्थाहरुले जनाएका छन् ।
सिमाबाट नेपाल भित्रिने क्रममा कतिपय नेपालीहरु भोकै रहेको जानकारी आएपछि केहि संस्थाहरु मिलेर खाना, पानी र मास्कको ब्यवस्था गरिएको बाँके युनेस्को क्लबका संरक्षक प्रवेज अली सिद्दिकीले बताउनु भयो ।
प्लान इनटरनेसनल नेपालको आर्थिक सहयोग र नेपालगन्ज उपमहानगरपालिकाको समन्वयमा बाँके युनेस्को क्लबले विहिबार विहान देखि जमुनाहामा खना वितरण कार्यको सुरु गरिएको हो ।
प्रदेशसभाका सभासद कृष्ण केसी नमुना, बाँकेका प्रमुख जिल्ला अधिकारी राम बहादुर कुरुम्वांग, नेपाली सेनाका कर्णेल नकुल थापा र बाँकेका प्रहरी प्रमुख विर बहादुर ओली लगायतले भारतबाट आउनेहरुलाई खाना पानी र मास्क वितरण गरेर खाना खुवाउने कार्यको आरम्भ गरेका थिए ।
अहिले दैनिक जमुनाहा नाकाबाट दुई हजारको हाराहारीमा नेपालीहरु प्रवेश गरिरहेका छन् । उनिहरुलाई नाकाबाटै सिधै गाडीमा हालेर सम्बन्धित जिल्ला र पालिकाहरुसम्म पुरयाउने काम भैरहेको छ ।
बाँकेका नागरिकलाई महेन्द्र बहुमुखि क्याम्पसको क्वारेन्टाइनमा राखिने गरिएको छ भने अन्यलाई सम्बन्धित जिल्लामा सोझै पठाउने गरिएको प्रमुख जिल्ला अधिकारी कुरुम्वांगले बताए।
विहिबार दिउँसो सम्म ६ सय बढीलाई सो खाना, पानी र मास्क वितरण गरिसकिएको बाँके युनेस्को क्लबका अध्यक्ष राजेन्द्र चौधरीले जानकारी दिए ।
प्रतिक्रिया