भरतपुर अस्पतालको आईसीयूमा कोरोना संक्रमितको निधन, हालसम्म मृत्यु हुनेको संख्या १५ पुग्यो

चितवन । कोरोना भाइरसको संक्रमणबाट अर्का एक व्यक्तिको मृत्यु भएको छ ।

चितवनको भरतपुर अस्पतालको आइसीयूमा उपचाररत कोरोना संक्रमित व्यक्तिको मृत्यु भएको हो ।

भरतपुर महानगरपालिका वडा नं. ११ का निवासी ६८ वर्षीय व्यक्तिको मंगलबार बिहान मृत्यु भएको अस्पतालले जनाएको छ । उनलाई सोमबार मात्रै कोरोना संक्रमण पुष्टि भएको थियो। अहिले उनको शव भरतपुर अस्पतालको आईसीयूमै छ।

मुट र निमोनियाको समस्यामा रहेका उनलाई जिल्ला प्रशासन कार्यालयको अनुमति विना नारायणी सामुदायिक अस्पतालले भरतपुर अस्पतालमा सारेको थियो । गम्भीर अवस्थाका बिरामीलाई अक्सिजनको भरमा अस्पताल सारिएको विषयमा जिल्ला प्रशासन कार्यालयले आपत्ति जनाएको छ ।

यससँगै कोरोनाबाट मृत्यु हुनेको संख्या १५ पुगेको छ ।