काठमाडौं । विदेशमा रहेका नेपाली उद्धार गर्ने क्रममा आज कुवेतबाट आएको जहाज त्रिभुवन अन्तराष्ट्रिय विमानस्थलमा अवतरण गरेको छ ।
कुवेतबाट आउने दुई जहाजमध्ये जजिरा एयरवेजको ए–३२० न्यारोबडी जहाज काठमाडौं आएको हो। जहाजमा कुवेतमा आममाफी पाएर आश्रय क्याम्पमा बसिरहेका नेपाली महिला सहित १६१ जना यात्रु रहेका छन् । अर्को जहाज आजै दिउँसो आइपुग्ने तालिका रहेको छ । आज नेपाल आइपुगेका सबैलाई कुवेतले नै ल्याइदिएको हो ।
उनीहरुलाई विमानस्थलभित्रको काम सकिएपछि नेपाली सेनाले तयार पारेको होल्डिङ सेन्टरमा राखिनेछ । त्यसपछि आफ्नै खर्चमा होटल क्वारेन्टिमा बस्नेहरुलाई होटलमा र घर फर्किनेहरुलाई सम्बन्धित तहको समन्वयमा घर पठाइनेछ । तर उनीहरु घरमा भने बस्न पाउनेछैनन् । सरकाले तोकेको क्वारेन्टिनमा अनिवार्य १४ दिन बस्नैपर्नेछ ।
आफनो देशमा रहेका अस्थायी क्याम्प र डिपोर्टटेसन सेन्टरमा राखिएका नेपालीलाई आफ्नै खर्चमा दैनिक दुइटा विमानमार्फत नेपाल पठाउने कुवेतले नेपालसमक्ष प्रस्ताव राखेको थियो। त्यसैअनुसार नेपाली नागरिकलाई ल्याउन थालिएको हो । कुवेतको अस्थायी क्याम्प र डिपोर्टटेसन सेन्टरमा २ हजार ९ सय ९१ नेपाली छन्। तीमध्ये १ हजार ६ सय ८८ पुरुष र १ हजार ३ सय ३ महिला छन्।
प्रतिक्रिया