पर्वत । पर्वतको कुश्मा नगरपालिका वडा नं. ३ दुर्लुङमा पहिरो जाँदा दुई घर पुरिएका छन् ।
भिषण वर्षाका कारण राति ९ बजे पहिरो झरेको स्थानियले बताएका छन् । पहिरो गएको स्थान ढकालबारी, काफलचौर सरुनचौर क्षेत्र हो ।
अहिले राति ११ बजेसम्मको समयमा ३ जनाको शव भेटिएको छ । ६ जना पहिरोमै बेपत्ता रहेको घटनास्थलमा रहेका प्रहरीको भनाई उद्दृत गर्दै स्थानीय सञ्चारमाध्यमले जनाएका छन् ।
प्रहरी निरिक्षक बुद्धि सुवेदीका अनुसार पहिरोले पुरिएर अन्य ६ जना सम्पर्क विहीन छन् । अहिले भिषण पानी परिरहेको र खोजी कार्यलाई पनि जारी राखिएको उहाले बताउनुभएको छ ।
पहिरोले स्थानीय तुलबहादुर थापा र कमला विकको घर पुरिएको हो । पहिरोमा पुरिएर मृत्यु भएका तुलबहादुरकी श्रीमती मिनकुमारी थापा र नातिनी विविशा थापाको शव फेला परेको हो । पहिरोमा परी तुलबहादुरका छोरा र छोरीतर्फका २ नाति बेपत्ता रहेका छन् ।
वडा नम्बर तीनका वडाध्यक्ष तेजप्रसाद पाध्याका अनुसार कमला विकको पनि शव फेला पारिएको छ । उद्धारका लागि नेपाली सेनासहितको टोली पनि घटनास्थल पुगेको छ ।
प्रतिक्रिया