मुस्ताङमा पनि छि-यो कोरोना, गण्डकीमा ५० नयाँ संक्रमित थपिए

पोखरा । गण्डकी प्रदेशमा थप ५० जना व्यक्तिलाई कोरोना भाइरसको संक्रमण पुष्टि भएको छ ।

हिमाल पारिको जिल्ला मुस्ताङमा पहिलोपटक कोरोना संक्रमण देखिएको छ । मुस्ताङको घरपजोङ गाउँपालिकाका एक जनालाई संक्रमण पुष्टि भएको हो ।

प्रदेश स्वास्थ्य निर्देशनालयले शनिबार साँझ जारि गरेको पछिल्लो तथ्याङ्क अनुसार प्रदेशमा मुस्ताङसहित नयाँ ५० जना संक्रमित थपिएका हुन् ।

अध्यावधिक विवरण अनुसार गण्डकी प्रदेशमा कोरोना संक्रमितको संख्या ४८८ पुगेको छ ।

थप भएका नयाँ संक्रमितहरुमा सबैभन्दा धेरै बागलुङमा २९ जना रहेका छन् ।

जसमध्ये, गलकोट नगरपालिकाका ८ जना, बागलुङ नगरपालिकाका ६ जना, बडिगाड गाउँपालिकाका ३ जना, ताराखोला गाउँपालिकाका ८ जना र ढोरपाटन नगरपालिकाका १ जना रहेका छन् ।

यसैगरी, तनहुँको व्यास नगरपालिकाका २ जना रहेका छन् भने नवलपरासी पूर्वका १८ जनामा संक्रमण पुष्टि भएको छ ।

सबै संक्रमित अहिलेसम्म सम्बन्धित पालिकाको क्वारेन्टाइनमै रहेका छन् । उनीहरू सबैलाई सम्बन्धित जिल्लामा रहेका आईसोलेसन कक्षमा लैजाने तयारी भैरहेको स्वास्थ्य निर्देशनालयले जनाएको छ ।