काठमाडौं । सरकारले कर तिर्न दिएको समय सीमाप्रति असन्तुष्टि जनाएका उद्योगी व्यवसायीहरुले स्वतस्फूर्त रुपमा कर तिरेर राज्यलाई सहयोग गरेका छन् ।
उद्योगी व्यवसायीहरुले असार महिना सुरु भएसँगै धमाधम कर तिर्न थालेका हुन् । सर्वोच्च अदालतले केही दिन अघि लकडाउनका कारण समस्यामा परेका उद्योगी व्यवसायीलाई तत्काल कर तिर्न बाध्यन नबनाउन निर्देशन दिएको थियो ।
कर तिर्ने समयसीमा तोकेको सरकारको निर्णय तत्काल कार्यान्वयन नगराउन भन्दै सर्वोच्चले उद्योगी व्यवसायीको पक्षमा निर्णय दिएपनि उनीहरुले राज्य संकट परेको बेलामा सहयोग गर्नुपर्ने भन्दै स्वतस्फूर्त रुपमा कर तिर्न थालेका हुने ।
उद्योगी व्यवसायीको यो कामबाट संकटको बेलामा राज्यलाई सबैको साथ मिल्छ भन्ने सकारात्मक सन्देश प्रवाह भएको छ ।
अहिले सबै करदाता कार्यालयहरुमा व्यवसायीहरुको चहलपहल बढेको छ । आइतबार मात्रै सूर्य नेपालले ९० करोड कर तिरेको छ । एनसेलले १ अर्ब २२ करोड कर तिरेको छ । नेपाल टेलिकमले पनि ९२ करोड रुपैयाँ कर तिरिसकेको छ ।
सूर्य नेपालजस्तै ठूला व्यवसायीहरुले मूल्य अभिवृद्धि कर (भ्याट) र आयकर तिर्न थालेका हुन् । जसका कारण जेठ महिनामा अति न्यून रहेको राजस्व संकलन असारको पहिलो सातामै ह्वात्तै माथि आएको छ । सात दिनभित्र ठूला करदाता कार्यालयले मात्रै ९ अर्ब भन्दा बढी राजस्व संकलन गरेको छ ।
नेपाल उद्योग वाणिज्य महासंघ र नेपाल उद्योग परिसंघले आफ्ना सदस्यहरुलाई राज्यलाई निमानुसार बुझाउनुपर्ने कर बुझाउन आग्रह गरेका थिए ।
अर्थमन्त्री डा. युवराज खतिवडाले सरकारको आम्दानीले खर्च धान्न मुस्किल परेको संसदमै बताएका थिए । दैनिक खर्च धान्न मुस्किल परेपछि सरकारले हालसम्म सरकारले १ सय ६५ अर्ब भन्दा बढि आन्तरिक ऋण उठाइसकेको छ।
उद्योगी व्यवसायीहरुले पनि राज्यलाई समयमै कर तिरेर संकटबाट जोगाउन प्रयत्न गरेका छन् ।
प्रतिक्रिया