काठमाडौं । सरकारले संसदको बजेट अधिवेशन अन्त्य गर्न राष्ट्रपतिसमक्ष सिफारिस गरेको छ ।
केहीबेर अघि बसेको मन्त्रिपरिषद्को बैठकले आजै बिहीबार बेलुका ५ बजेबाट अधिवेशन गर्न राष्ट्रपति विद्यादेवी भण्डारीसमक्ष सिफारिस गर्ने निर्णय गरेको हो ।
सत्तारुढ नेपाल कम्युनिष्ट पार्टी नेकपाभित्र जारी अन्तसंघर्षकै बीच सरकारले संसद अधिवेशन अन्त्यका लागि राष्ट्रपतिलाई सिफारिस गर्ने निर्णय गरेको हो ।
मन्त्रिपरिषद् बैठक बस्नु अघि प्रधानमन्त्री केपी शर्मा ओलीले राष्ट्रपति विद्यादेवी भण्डारीसँग परामर्श गरेका थिए ।
अधिवेशन अन्त्य भएसँगै प्रधानमन्त्री ओलीलाई आफुअनुकुल अध्यादेश जारी गर्न बाटो खुल्ने भएको छ ।
सरकारले गत बैशाखमा ल्याएको राजनीतिक दल विभाजन सम्बन्धी विधेयक पार्टीभित्र र बाहिरको चर्को विरोधका कारण फिर्ता लिएको थियो ।
संसद अधिवेशन अन्त्य भएसँगै प्रधानमन्त्रीले सो विधेयकलाई अध्यादेशको रुपमा पुनः जारी गर्नसक्ने अवस्था रहने छ । यो अध्यादेश जारी भएमा कुनै पनि राजनीति दल विभाजनका लागि ४० प्रतिशत संसद सदस्य या पार्टी केन्द्रीय कमिटीको ४० प्रतिशत सदस्यको सहमतिसहितको हस्ताक्षर भए पुग्ने छ ।
यसअघिको प्रावधानअनुसार राजनीति दल विभाजन गर्न संसदीय दल र पार्टी केन्द्रीय कमिटीमा ४० प्रतिशत सदस्यको सहमति आवश्यक पथ्र्यो ।
पार्टीभित्रको जारी विवादका बीच यदि यो अध्यादेश जारी भएमा नेकपाको अन्तसंघर्ष नयाँ मोडमा प्रवेश गर्नेछ ।
अहिले प्रधानमन्त्री निवास बालुवाटारमा सत्तारुढ नेकपाको स्थायी समितिको बैठक बसिरहेको छ।
प्रतिक्रिया