दाइको अन्तिम संस्कार गरेर भारतबाट फर्किएका रौतहटका एक भाइको पनि कोरोना संक्रमणबाटै मृत्यु

काठमाडौं । कोरोना भाइरसको संक्रमणबाट रौतहटका एक जना युवकको मृत्यु भएको छ ।

स्वास्थ्य तथा जनसंख्या मन्त्रालयमा आयोजित नियमित पत्रकार सम्मेलनमा मन्त्रालयका प्रवक्ता प्राडा. जागेश्वर गौतमले कोरोनाबाट नेपालमा थप एक जनाको मृत्यु भएको पुष्टि गरेका छन् ।

रौतहट परवाह नगरपालिका ७ का ३६ वर्षीय युवाको बुधबारै दिउँसो साढे २ बजे उपचारका क्रममा मृत्यु भएको प्रवक्ता गौतमले जानकारी दिए ।

उनका दाजुको पनि कोरोना संक्रमणबाट भारतमा मृत्यु भएको थियो । दाजुको अन्तिम संस्कारका लागि भारतको ब्याङ्लोर गएका ती युवा गत असार २४ गत नेपाल आएका थिए। नेपाल आएलगत्तै उनी रौतहटकै परवाह क्वारेन्टिनमा बसेका थिए।

तर, असार २९ गते रुघाखोजी, ज्वरो र स्वास्प्रश्वासमा समस्या देखिएपछि उनी नारायणी अस्पतालमा उपचारका लागि पुगेका थिए । त्यसलगत्तै उनलाई भर्ना गरिएको थियो । सोही दिन उनको स्वाब संकलन गरी हेटौँडास्थित किटजन्य प्रयोगशालामा परीक्षण गर्दा उनको रिपोर्ट पोजिटिभ आएको थियो

स्वास्थ्यमा निकै समस्या देखिएपछि बुधबार बिहानैदेखि उनलाई भेन्टिलेटरमा राखिएको थियो । तर दिउँसो साढे २ बजे उनको निधन भयो ।

यससँगै नेपालमा कोरोनाबाट मृत्यु हुनेको संख्या ३९ पुगेको छ।