काठमाडौं । कोरोना पोजेटिभ पुष्टि भएपछि होम क्वारेन्टाइनमा रहेका भारतीय अभिनेत्री ऐश्वर्या राय बच्चन र उनकी छोरी आराध्यालाई अस्पताल भर्ना गरिएको छ ।
गत आइतबार कोरोना सङ्क्रमण पुष्टि भएपछि घरमै क्वरेन्टीनमा बसेका आमाछोरीलाई राति अस्पताल लगिएको भारतीय सञ्चारमाध्यमले जनाएका छन् ।
उनीहरुलाई डाक्टरको आवश्यकता परेपछि अस्पताल लगिएको बच्चन परिवार श्रोतलाई उदृढ गर्दै समाचार एजेन्सी पीटीआईले उल्लेख गरेको छ । एजेन्सीले डाक्टरको आवश्यकता परेको भनेपनि आमाछोरीकै अवस्था सामान्य रहेको खबरमा उल्लेख गरेको छ ।
ऐश्वर्याका श्रीमान् अभिनेता अभिषेक बच्चन र ससुरा बलिउड महानायक अमिताभ बच्चनलाई गएको हप्ता नै कोरोना पुष्टि भएपछि अस्पताल भर्ना गरिएको थियो ।
भारतमा गएको २४ घण्टामा मात्रै ३४ हजार आठ सय ८४ जनामा कोरोना भाइरसको सङ्क्रमण पुष्टि भएको त्यहाँको स्वास्थ्य मन्त्रालयले जनाएको छ ।
योसँगै भारतमा सङ्क्रमितको सङ्ख्या १० लाख ४० हजार नाघेको छ । भारतमा अहिलेसम्म २६ हजारभन्दा धेरैको कोरोना सङ्क्रमणको कारण ज्यान गएको छ ।
प्रतिक्रिया