बाग्मती प्रदेशको धादिङमा पहिरोले ६ घर बगायो, १ किशोरी बेपत्ता

काठमाडौं । बाग्मती प्रदेशको धादिङको गजुरी २ मलेखुमा पहिरो खस्दा छ वटा घर बगाएको छ भने एकजना किशोरी वेपत्ता भएकी छन् । पहिरोमा परेर केहि स्थानीय सामान्य घाइते भएका छन् ।

निरन्तर भईरहेको वर्षाका कारण पहिरो खस्दा स्थानीय १७ वर्षीया निरुता परियार बेपत्ता भएको प्रहरीले जनाएको छ । घाईते भएका स्थानियबासीको गजुरीमा उपचार भईरहेको छ । वेपत्ता परियारको खोजी भइरहेको इलाका प्रहरी कार्यालय गजुरीले जनाएको छ ।

निरन्तर वर्षापछिको पहिरोले छ वटा घर बगाउँदा मलेखु भण्डारा सडकखण्ड समेत अवरुद्ध बनेको छ । वर्षा नरोकिएकाले उद्दार गर्न कठिनाई भएको समेत प्रहरीले जनाएको छ ।