५० प्रतिशत भन्सार छुटमा चिनी आयात गर्न दिने सरकारको निर्णय

काठमाडौं । सरकारले चिनीमा लगाउँदै आएको भन्सार महशुलमा ५० प्रतिशत छुट दिने निर्णय गरेको छ ।

गत साउन १२ गते बसेको मन्त्रिपरिषद् बैठकले ५० प्रतिशत भन्सार छुटसहित ३० हजार मेट्रिक टन चिनी आयात गर्न छुट दिने निर्णय गरेको सरकारका प्रवक्ता डा. युवराज खतिवडाले बताए ।

यो आयात खाद्य व्यापार कम्पनी लिमिटेड र साल्ट ट्रेडिङ लिमिटेडले गर्नेछन् । चाडवाडको समयमा चिनीको आपूर्ति कम नहोस भनेर भन्सार छुट सहित आयात गर्ने निर्णय भएको खतिवडाले बताए ।

उद्योग वाणिज्य तथा आपूर्ति मन्त्रालयको आग्रहमा अर्थ मन्त्रालयले उक्त प्रस्ताव मन्त्रिपरिषदमा पुर्याएको थियो।

नेपालमा उत्पादन हुने चिनीले माग धान्न नसकेपछि हरेक वर्ष चिनी आयात हुनेगरेको छ ।