काठमाडौं । संसद् बैठकको तयारीका विषयमा छलफल गर्न संसद सचिवालयले सर्वदलीय बैठक बोलाएको छ।
उक्त बैठक बुधबार चैत १८ गते दिउँसो १ बजे संसद् सचिवालयमा बस्ने तय गरिएको छ।
संसद् सचिवालयका प्रवक्ता एकराम गिरीका अनुसार संसद् बैठकअघि दलहरूबीच छलफल गर्न सर्वदलीय बैठक बोलाउने प्रचलनअनुसार बैठक आह्वान गरिएको हो। ज्येष्ठ सदस्य अर्जुननरसिंह केसीले नै बैठकको नेतृत्व गर्नेछन्।
बिहीबार चैत १९ गते दिउँसो २ बजे प्रतिनिधिसभाको पहिलो बैठक बस्ने तय भएको छ। सोही बैठकको कार्यसूची तथा व्यवस्थापनबारे छलफल गर्न संसद्मा प्रतिनिधित्व गर्ने छ वटा दललाई बैठकमा बोलाइएको बताइएको छ।
सभामुख चयन नभएसम्म प्रतिनिधिसभाको बैठकको अध्यक्षता ज्येष्ठ सदस्यले गर्ने व्यवस्था छ। यसअघि केसीले चैत १२ गते प्रतिनिधिसभाका नवनिर्वाचित सदस्यहरूलाई शपथ गराएका थिए।
प्रतिक्रिया