नेपालगन्ज । बाँकेमा वडा प्रहरी कार्यालयका ३० जना प्रहरी सहित आईतबार ४६ जनालाई कोरोना संक्रमण पुष्टि भएको छ ।
भेरी अस्पताल नेपालगन्जमा गरिएको पीसीआर परीक्षणमा वडा प्रहरीका ईन्चार्ज प्रहरी निरिक्षक सहित ३० जना प्रहरी कर्मचारी र अन्य सर्वसाधारण गरि ४६ जनामा कोरोना संक्रमण पुष्टि भएको हो ।
यसअघि वडा प्रहरी कार्यालयका प्रहरीलाई कोरोना भाइरस देखिएपछि वडा सिल गरेर ४१ जनाको स्वाव संकलन गरिएको थियो । ४१
प्रहरीको नमुनामा प्रहरी निरिक्षक सहित ३० जनामा संक्रमण देखिएको हो । वडा प्रहरीबाट थुनुवा तथा प्रहरीका कन्ट्याक्ट ट्रेसिङमा परेका ८० जनाको स्वाव संकलन गरिएको थियो । ५६ जना कार्यरत रहेको वडा प्रहरी कार्यालयमा ३५ जना भन्दा बढीलाई संक्रमण पुष्टि भएपछि झण्डै वडा प्रहरी कार्यालय नै खाली हुने अवस्था सिर्जना भएको छ । जिल्ला प्रहरी कार्यालयमा पर्याप्त जनशक्ति रहेकाले वडा खालि हुँदैमा जिल्लाको सुरक्षामा असर नपर्ने जिल्ला प्रहरी कार्यालय बाँकेका प्रवक्ता नायव प्रहरी उपरिक्षक सुवास खड्काले बताए ।
वडामा संक्रमित भएकै संख्यामा दङ्गा नियन्त्रण प्रहरी गणबाट थप प्रहरी जनशक्ति बोलाएर सुरक्षाको ब्यवस्था मिलाईएको बाँके प्रहरी प्रमुख ओमबहादुर रानाले बताए ।
आज पुष्टि भएकाहरुको सम्पर्कमा आएकाहरुको परीक्षणमा यो संख्या अझै थपिन सक्ने आँकलन गरिएको छ ।
प्रतिक्रिया