काठमाडौं । कोरोना भाइरसको संक्रमणबाट थप ४ जनाको मृत्यु भएको स्वास्थ्य मन्त्रालयले पुष्टि गरेको छ ।
पछिल्लो रिपोर्ट अनुसार सिन्धुपाल्चोकको बाह्विसे नगरपालिका वडा नं. ४ निवासी एक जना वृद्धको साउन २२ गते निधन भएको छ ।
मनमोहन कार्डियो भास्कुलर सेन्टर महाराजगन्जमा उपचार गराउँदा गराउँदै ८६ वर्षीय ती वृद्धको मृत्यु भएको स्वास्थ्य तथा जनसंख्या मन्त्रालयका प्रवक्ता प्राडा. जागेश्वर गौतमले बताए ।
यस्तै, काभ्रेको पाँचखाल नगरपालिका निवासी एक महिलाको ललितपुरको किस्ट अस्पतालमा उपचार गर्दागर्दै मृत्यु भएको प्रवक्ता डा. गौतमले जानकारी दिए ।
यसैगरी धनुषामा साउन २५ र २६ गते गरी दुई जनाको मृत्यु भएको छ । धनुषाको मृत्युको समाचार यसअघि नै सार्वजनिक भैसके पनि स्वास्थ्य मन्त्रालयले भने आजमात्रै पुष्टि गरेको हो ।
धनुषाको विदेह नगरापालिकामा बस्ने ६० वर्षीय पुरुषको २६ गते राति प्रादेशिक अस्पताल जनकपुरमा मृत्यु भएको हो । यस्तै, धनुषाकै मिथिला बिहारी नगरपालिका वडा नंं ५ का एक व्यक्तिको साउनन २५ गते मृत्यु भएको थियो ।
स्वास्थ्य मन्त्रालयका अनुसार नेपालमा कोरना भाइरसको संक्रमणबाट मृत्यु हुनेको संख्या ८३ पुगेको छ ।
प्रतिक्रिया