काठमाडौं । कान्तिपुर दैनिकका सहायक सम्पादक बलराम बानियाँको निधन भएको छ ।
बानियाँ सोमबारदेखि परिवार र कार्यालयसँग सम्पर्कबिहीन भएका थिए । बानियाँको मृत शरीर मंगलबार बिहान ११ बजेतिर मकवानपुरको सिस्नेरीस्थित माण्डो जलविद्युत परियोजना क्षेत्रमा फेला परेको महानगरीय अपराध महाशाखाका एसएसपी दीपक थापाले बताएका छन् । बानियाँको शव हेटौंडा अस्पतालमा राखिएको छ ।
उनी पछिल्लोपटक राजधानीको बल्खुचोकमा सोमबार करिब पौने चार बजे देखापरेको प्रहरीले जानकारी दिएको कान्तिपुर दैनिकको अनलाइन संस्करणले उल्लेख गरेको छ ।
कान्तिपुरका अनुसार बल्खुमा प्रहरीको गस्ती टोलीले सोमबार दिउँसो देखेपछि उनलाई सोधपुछ गरेको थियो । त्यसपछि उनी घर जाने भन्दै बल्खु खोलाको पुलमुनि गएको देखिएको प्रहरीले जनाएको छ ।
एसएसपी थापाका अनुसार बानियाँ पुलमुनि जाँदै गर्दा उनको जुत्ता हिलोमा अड्किएको र त्यसपछि खोलाको पानीमा लडेपछि स्थानीयले उद्धार गर्ने प्रयास गरेका थिए । तर पानीको अत्याधिक वहाबले गर्दा उद्धार गर्न नसकेको स्थानीयले बताएका छन् । त्यसबेला उनको पहिचान खुल्न सकेको थिएन ।
बानियाँ एकदशक भन्दा अघिदेखि कान्तिपुरमा कार्यरत रहेका थिए । बानिँयाका श्रीमती, एक छोरा र एक छोरी छन् ।
प्रतिक्रिया