कोरोना संक्रमणबाट वीरगन्जमा अर्का एक जनाको मृत्यु

वीरगन्ज । कोरोना भाइरसको हटस्पट बनेको पर्सामा फेरि अर्का एकजनाको मृत्यु भएको छ ।

वीरगन्जको मुर्ली बस्ने ६० वर्षीय पुरुषको शुक्रबार साँझ मृत्यु भएको गण्डक कोभिड अस्प्तालले जनाएको छ ।

उच्चरक्तचाप, मधुमेह तथा प्यारालायसिसबाट पीडित मृतकलाई कोरोना संक्रमण पुष्टि भएसँगै साउन २४ गते अस्पताल भर्ना गरिएको थियो ।

तर शुक्रबार साँझ स्वास्थ्यमा अचानक समस्या उत्पन्न भै ७ बजेतिर उनको मृत्यु भएको कोभिड अस्पतालका संयोजक डा. उदयनारायण सिंहले बताए ।

साउन यता पर्सामा कोरोना भाइरसका संक्रमित र मृत्यु हुनेको संख्या निरन्तर उकालो लागिरहेको छ । कोरोना संक्रमणबाट साउन महिनामा मात्रै पर्सामा २२ जनाको मृत्यु भएको छ ।

पछिल्लो मृत्युसहित हालसम्म नेपालमा १०१ जनाले कोरोना संक्रमणबाट ज्यान गुमाएका छन् भने २५ हजार ५५१ जना संक्रमित भएका छन् ।

नेपालमा कोरोनाको मृत्युदर प्रति दशलाखमा ३ दशमलव ४ प्रतिशत रहेको स्वास्थ्य तथा जनसंख्या मन्त्रालयले बताएको छ ।