रुपन्देहीमा थपिए १७ नयाँ संक्रमित, नेपाल पस्न खोज्ने भारतीय नागरिकमा पनि देखियो कोरोना

बुटवल । पछिल्लो २४ घण्टामा रुपन्देहीमा १ जना भारतीय नागरिक सहित १८ जनामा कोरोना भाइरस संक्रमण पुष्टि भएको छ ।

जिल्लामा रहेका बिभिन्न प्रयोगशालमाबाट आएको रिपोर्टमा सिद्धार्थ नगर नगरपालिकाका १४ जना , बुटवल उपमहानगरमा ३ जना र १ जना भारतबाट नेपाल आउन खोज्ने भारतीय नागरिकमा संक्रमण पुष्टि भएको स्वास्थ्य कार्यालय रुपन्देहीले जनाएको छ ।

सिद्धार्थनगर नगरपालिका स्थित बैंक रोडमा रहेको एसबिआई बैंकका १२ जना कर्मचारीमा कोरोना पुष्टि संक्रमण भएको स्वास्थ्य कार्यालय रुपन्देहीका कोरोना फोकल पर्शन केदार शाहले जानकारी दिए । सिद्धार्थनगर १ का एकै परिवारका २ जनामा पनि संक्रमण पुष्टि भएको उनले बताए । शाहका अनुसार बुटवल उपमहानगर ११ का २ जनामा संक्रमण पुष्टि भएको छ भने १३ नम्बर वार्डका १ जनामा पनि संक्रमण पुष्टि भएको छ ।

भारतबाट नेपाल प्रवेश गर्न खोज्ने ८ जनाको समूहको सिमा पारी राखि स्वाव लिएर पीसीआर परीक्षण गर्दा १ जनामा संक्रमण पुष्टि भएपछि उनीहरुलाई भारत तर्फ नै फर्काईएको शाहले बताए ।