नेपालगञ्ज । प्रहरीको अनुसन्धानकै क्रममा रहेका एक जना थुनुवालाई कोरोना संक्रमण पुष्टि भए पछि जिल्ला प्रहरी कार्यालय बाँकेमा खैलाबैला भएको छ ।
भेरी अस्पताल, नेपालगञ्जले शुत्रबार सार्वजानिक गरेको पीसीआर रिपोर्टमा जिल्ला प्रहरी कार्यालयमा रहेका थुनुवालाई कोरोना संक्रमण पुष्टि भएपछि थुनुवाको सम्पर्कमा आएका प्रहरी तथा अन्य थुनुवाको बिवरण लिन सुरु गरिएको छ ।
अस्पतालको पछिल्लो पीसीआर परीक्षणको रिपोर्टमा लागु औषध मुद्दामा अदालतबाट म्याद थप गरि हिरासतमा रहेका २४ वर्षीय थुनुवालाई कोरोना देखिएको हो ।
म्याद थपका लागि अदालत लैजानु अगाडी कोरोना परीक्षणका लागि स्वाव लिईएकोमा उनको रिपोर्ट पोजिटिभ आएको जिल्ला प्रहरी कार्यालय बाँकेका प्रवक्ता प्रहरी नायव उपरिक्षक सुवास खड्काले बताए । उनले अदालत लैजाने क्रममा र उनलाई पक्राउ गरेर ल्याउने क्रममा सम्पर्कमा रहेका प्रहरी तथा अन्यको विवरण तयार गरि उनीहरुलाई क्वारेन्टिनमा बसालिएको जानकारी दिए । कोरोना पुष्टि भए पछि संक्रमितलाई कृषि तालिम केन्द्रको आइसोलेसनमा पठाईएको डीएसपी खड्काले बताए ।
खड्काका अनुसार बाँके प्रहरीले नयाँ थुनुवालाई पक्राउ गरेर ल्याए लगत्तैछुट्टै राख्ने र कोरोना जाँच गरेर नेगेटिभ आएपछि मात्रै संगोलमा मिसाउने गरेको छ । बाँके प्रहरीले अभियुक्तलाई समातेर ल्याइसकेपछि अदालत बुझाउने र अनुसन्धान गर्नुपर्ने भएकालाई पीसीआर रिपोर्ट नआउंदा सम्म छुट्टै राख्ने गरेको छ ।
बाँके प्रहरी प्रमुखकारुपमा प्रहरी उपरिक्षक ओमबहादुर रानाको बाँकेमा सरुवा भएसँगै बाँके प्रहरीले वर्षौ देखि फरार रहेका बिभिन्न कसुरमा सजाँए पाएका अभियुक्तहरुलाई पक्राउ गर्ने अभियान सुरु गरेको छ ।
प्रतिक्रिया