रौतहट । गत बुधबार राती रौतहटको माधवनारायण-२ खेसरैयामा भएको पुजारी हत्याकाण्डको अनुसन्धान गर्न प्रदेश नम्बर २ प्रदेश प्रहरी कार्यालयले अनुसन्धान टोलि गठन गरेको छ ।
स्थानीय मन्दिरका पुजारी श्रीराम साहको हत्यका बिषयमा अनुसन्धान गर्न प्रदेश प्रहरी कार्यालय जनकपुरले वरिष्ठ प्रहरी उपरीक्षक यज्ञविनोद पोख्रेलको नेतृत्वमा अनुसन्धान टोलि गठन गरेको हो । पोखरेल नेतृत्वको टोलि तालिम प्राप्त कुकुर सहित आईतबार खेसरैया पुगेको छ ।
खेसरैया पुगेको बरिष्ठ प्रहरी उपरिक्षक पोख्रेलको टोलीले आईतबारदेखि नै घटना स्थलको स्थलगत रुपमा अनुसन्धान सुरु गरेको छ । अनुसन्धानको प्रारम्भमा पुजारीले प्रयोग गर्दै आएको मोबाइल उनको पारिवारिक पृष्ठभूमि, छिमेकी, नातेदार लगायत सित सोधपुछ गरी अनुसन्धानलाई तीव्रता दिइएको जिल्ला प्रहरी कार्यालय रौतहटका प्रहरी उपरिक्षक रबिराज खडकाले जानकारी दिए ।
खेसरैयास्थित हनुमान मन्दिरका ६५ वर्षीय पुजारी साहमाथि बुधबार राति करिब साढे ९ बजे गोली प्रहार गरी हत्या भएको थियो ।
प्रहरी उपरिक्षक खड्काले हत्यामा संलग्न चाडै पक्राउ गर्ने प्रतिबद्धता ब्यक्त गर्दै विभिन्न कोणबाट अनुसन्धान जारी रहेको बताए ।
प्रतिक्रिया