नेपालगन्ज । बाँकेमा कोभिड–१९ विरुद्धको अभियानमा ‘फ्रन्टलाइन’ मा खटिदै आएका दुई जना चिकित्सकलाई कोरोना संक्रमण पुष्टि भएको छ ।
पश्चिम क्षेत्रमा चर्चित भेरी अस्पतालका वरिष्ठ फिजिसियन डा. सांकेत रिसाल र डा. राजन पाण्डेलाई संक्रमण पुष्टि भएपछि उनीहरु सोमबारबाट आइसोलेसनमा बसेका छन् ।
दुवै जनाले सामाजिक सञ्जालमार्फत आफ्नो स्वास्थ्यस्थिति सार्वजनिक गर्दै आफुलाई संक्रमण भएको र स्वास्थ्य अवस्थामा सामान्य रहेको जानकारी दिएका छन् ।
दुई चिकित्सकसहित भेरीमा सोमबार अन्य दुई जना कर्मचारीमा कोरोना देखिएको थियो ।
भेरी अस्पतालका बरिष्ठ चिकित्सक रहेका दुबै जना नेपालगन्ज क्षेत्रमा निकै लोकप्रिय मानिन्छन् । उनीहरुले बाँकेमा कोरोना चिकित्सकहरुको भूमिका सम्बन्धि रणनीति तथा कोरोना बिरुद्धको अभियानमा स्वास्थ्य निकायको योजना बनाउन महत्वपूर्ण भूमिका खेलेका थिए । डा. रिसाल भेरी अस्पताल नेपालगन्जका कोरोना उपचारको फोकल पर्सन हुन् ।
दुवै डाक्टरले सामाजिक सञ्जालमार्फत आफ्नो सम्पर्कमा आएका सबैलाई क्वारेन्टिनमा बस्न र पीसीआर परीक्षण गराउन आग्रह समेत गरेका छन् ।
डाक्टर पाण्डे थारु समुदायमा मात्र हुने सिकलसेल एनिमिया रोगका अन्वेषक समेत हुन् ।
प्रतिक्रिया