गण्डकी प्रदेशमा संक्रमितको संख्या दुई हजार ८ सय २० पुग्यो

गण्डकी । गण्डकी प्रदेशमा कारोना सङक्रमितको सङ्ख्या दुई हजार ८ सय २० पुगेको छ ।

पछिल्लो विवरण अनुसार प्रदेशमा १५ जना सङ्क्रमित थपिएको गण्डकी प्रदेश स्वास्थ्य निर्देशनालयका निर्देशक एवम् गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा विनोदविन्दु शर्माले जानकारी दिए ।

विवरण अनुसार थपिनेमा नवलपरासी (बर्दघाट सुस्ता पूर्व) आठ , गोरखामा पाँच , कास्की र तनहुँमा एक/एक जना छन् ।

प्रदेशमा हालसम्म ५५ हजार ६५४ जनाको पिसिआर नमूना परीक्षण गरिएको थियो । तीमध्ये ५२ हजार ८३४ जनामा कोरोना सङ्क्रमण नदेखिएको निर्देशनालयले जनाएको छ ।

निर्देशनालयका अनुसार प्रदेशमा कोरोना संक्रमणका कारण हालसम्म २२ जनाको मृत्यु भएको छ भने सक्रिय संक्रमितको सङ्ख्या ९४९ जना र उपचारपछि एक हजार ८४९ जना निको भएका छन् । रासस