काठमाडौं । खाडी मुलुक बहराईनका राजकुमार नेपालका हिमाल आरोहण गर्न काठमाडौं आइपुगेका छन् ।
राजकुमार नासिर बिन हामिद अल खलिफासहित १८ जनाको टोली रहेको विशेष विमान बिहान ११ बजे त्रिभुवन अन्तराष्ट्रिय विमानस्थलमा अवतरण गरेको विमानस्थल कार्यालयले जनाएको छ । सो बिमान बहराइनको शेख ईशा एयरबेसबाट राति साढे १२ बजे नेपालका लागि प्रस्थान गरेको थियो ।
विमानस्थलमा राजकुमारको टोलीलाई परराष्ट्र मन्त्रालयका अधिकारीले स्वागत गरेका छन् । उनीहरुलाई काठमाडौं उड्नुअघि बहराइनस्थित नेपाली दूतावासले बिदाई गरेको थियो ।
राजकुमार नासिरले सोलुखुम्बुको खुम्बु क्षेत्र र गोरखाको मनास्लु हिमाल आरोहण गर्ने योजना रहेको छ ।
राजकुमारको भीआईपी टोली अबको ६ दिन गोकर्णस्थित रिसोर्टमा क्वारेन्टिनमा बस्ने र त्यसपछि आफ्नो आरोहण सुरु गर्नेछ ।
सुरुमा यो टोली काठमाडौंबाट लुक्लासम्म हेलिकप्टर र जहाजबाट र त्यहाँबाट लोबुचे हिमालको आधार शिविरसम्म पदायात्रा गर्ने आरोहणको जिम्मा लिएको सेभेन समिट ट्रेक्स प्रालिका अध्यक्ष मिङ्मा शेर्पाले जनाएका छन् ।
राजकुमार नासिरको आरोहण टोलीमा बहराइन डिफोन्स फोर्सका १५ जना सदस्य र तीन जना बेलायती नाागरिक रहेका छन् ।
लुक्ला लोबुचेको आधार शिविर पदयात्रा सकेपछि यो टोली काठमाडौं फर्केर मनास्लु हिमाल आरोहणका लागि जानेछ । यसका लागि उनीहरुले नेपालमा दुई महिना बिताउनेछन् ।
यसपटकको पदयात्रा आरोहण सफल भएपछि अर्को वर्षको सिजनमा सगरमाथा आरोहण गर्ने राजकुमार नासिरको योजना रहेको छ ।
कोरोना भाइरसको महामारीका कारण नेपालको पर्यटन उद्योग ठप्प भएका बेला विदेशी राष्ट्रको भीआईपी आरोहण टोली आएको छ । यसबाट नेपालको धर्मराउँदो पर्यटन उद्योगलाई वचाइराख्न टेवा पुग्ने नेपाल पर्यटन बोर्डले विश्वास लिएको छ ।
यो टोलीको सफल आरोहणपछि विदेशी पदयात्रा र हिमाल आरोहणमा नेपाल भ्रमण गर्न लालायित विदेशी पर्यटकलाई नेपालको वास्तविक अवस्थाबारे संसारभर प्रचार हुनसक्ने बोर्डले जनाएको छ ।
प्रतिक्रिया