काठमाडौं । राष्ट्रियसभामा राष्ट्रपतिबाट मनोनित कोटामा सांसद बनेका नेकपा उपाध्यक्ष बामदेव गौतमले सपथ लिएका छन् ।
राष्ट्रिय सभाअध्यक्ष गणेशप्रसाद तिमिल्सिनासमक्ष गौतमले पद तथा गोपनीयताको सपथ लिएकाछन् । राष्ट्रपति विद्यादेवी भण्डारीले गौतमलाई राष्ट्रिय सभाको रिक्त पदमा बिहीबार नै मनोनयन गरेकी थिइन ।
सपथपछि सञ्चारकर्मीहरुसँग कुरा गर्दै नवनियुक्त सांसद गौतमले राष्ट्रिय सभाको मर्यादा र गरिमालाई गिराउने काम नगर्ने प्रतिवद्धता जनाए । गौतमले जनताप्रति बफादार भएर भूमिका निभाउने बताए ।
उनले सभाको नियमावली अनुसार काम गर्ने जनाउँदै आफुलाई मनोनयन गर्न सिफारिस गर्ने र मनोनित गर्ने पार्टी, सरकार र राष्ट्रपतिप्रति आभार प्रकट गरे ।
गौतमले देशलाई समाजवादमा लैजानेबाहेक अन्य कुनै स्वार्थ नभएको भन्दै त्यो स्वार्थ पुरा गर्न संकल्प पुरा गर्ने जिकिर गरे ।
सत्तारुढ नेकपाले गौतमलाई राष्ट्रिय सभामा मनोनित गर्नका लागि सरकारलाई सुझाव दिएको थियो । नेकपाको सुझाव अनुसार सरकारले राष्ट्रपतिसमक्ष मनोनयनको सिफारिस गरेको थियो ।
प्रतिक्रिया