काठमाडौं । सत्तारुढ नेपाल कम्युनिष्ट पार्टी नेकपाको सचिवालय बैठक भोलि शनिबार बस्ने भएको छ ।
अध्यक्षद्वय केपी शर्मा ओली र पुष्पकमल दाहाल प्रचण्डबीच शुक्रबार बिहान भएको भेटमा भोलि सचिवालय बैठक बोलाउने सहमति भएको छ । बैठक शनिबार अपरान्ह ४ बजे बस्ने बताइएको छ ।
गत भदौ २६ गते बसेको स्थायी कमिटी बैठकबाट पार्टीभित्रको विवाद समाधान भएको बताइए पनि नेकपाभित्र अझै पनि विवाद कायमै छ ।
विशेषगरी मन्त्रिपरिषद् पुनर्गठन, संवैधानिक नियकामा नियुक्ति लगायतको विषयमा अध्यक्षद्वयबीच अझै पनि सहमति बन्न सकेको छैन ।
यहीबीचमा प्रधानमन्त्री ओलीले छलफल बिनै अमेरिका र बेलायतमा राजदूतहरु नियुक्त गरेपछि विवादको मुद्दा थप बढेको देखिएको छ ।
प्रधानमन्त्रीले बिहीबारको मन्त्रिपरिषदबाट पूर्वअर्थमन्त्री एवं आफ्ना आर्थिक सल्लाहकार डा. युवराज खतिवडालाई अमेरिका र पूर्वमुख्यसचिव लोकदर्शन रेग्मीलाई बेलायतका लागि राजदूत नियुक्तीको सिफारिस गरेका थिए ।
अर्कोतिर पार्टीको संगठनात्मक एकता टुंग्याउनका लागि अध्यक्ष र महासचिवलाई १० दिनको जिम्मा दिइएपनि त्यसबारेमा पनि कुनै टुंगो पुगेको छैन ।
अध्यक्षद्वयदेखि शिर्ष नेताहरु आफ्ना मान्छेलाई कसरी मन्त्री बनाउने र कसरी सुरक्षित बनाउने, संवैधानि निकायमा भागवण्डा कसरी गर्ने भन्नेमै केन्द्रित हुँदा पार्टीलाई जीवन्त राख्नुपर्ने संगठनात्मक गतिविधिमा भने फेरि पनि ध्यान दिएका छैनन् ।
सचिवालय बैठकमा पछिल्लो चरणमा भएका राजनीतिक नियुक्ति लगायतका विषयमा छलफल हुने बताइएको छ ।
प्रतिक्रिया