काठमाडौं । काठमाडौंमा आइतबार झन धेरै संक्रमित थपिएका छन् । उपत्यकामा १५ सय ९९ नयाँ संक्रमित थपिएका छन् ।
स्वास्थ्य तथा जनसंख्या मन्त्रालयका प्रवक्ता प्राडा जागेश्वर गौतमले दिएको जानकारी अनुसार काठमाडौंमा अहिलेसम्मकै सबैभन्दा धेरै संक्रमित थपिएका छन् ।
काठमाडौंमा मात्रै १३ सय ७३ जना संक्रमित थपिएका छन् । यसैगरी ललितपुरमा १८७ जना र भक्तपुरमा ३९ जना संक्रमित थपिएका छन् ।
काठमाडौं उपत्यकामा संक्रमितहरु बढेसँगै स्वास्थ्य मन्त्रालयले लक्षण नभएका संक्रमितलाई १० दिनमा पीसीआर गरेर नेगेटिभ आए घर पठाउने निर्णय गरेको छ ।
यस्तै, १० दिनमा पीसीआर गर्दा पोजेटिभ आए अर्को ४ दिन सम्म राखेर १४ दिनपछि परीक्षण नगरी घर पठाउने निर्णय गरेको छ।
यस्तै, जनस्वास्थ्य मापदण्ड पालना नगर्नेहरुलाई दण्डित गर्नेगरी कार्ययोजना बनाउने निर्णय पनि भएको प्रवक्ता डा गौतमले जानकारी दिए ।
यसैगरी प्रवक्ता गौतमले यस वर्षको दशैं जो जहाँ छ, त्यहीँ स्थानमा मनाउन अपिल गरेका छन् ।
पछिल्लो समय संक्रमणको अवस्था खराब भएको भन्दै गौतमले चाडबाडमा विशेष सतर्कता अपनाउन आग्रह गरेका हुन् ।
चाडबाड मनाउन काठमाडौंबाट हरेक वर्ष दशौं लाख मानिस घर फर्किन्छन् । तर, काठमाडौं नै अहिले कोरोनाको मुख्य केन्द्र बनेका कारण दशैं मान्न बाहिर गए कोरोना पनि सँगै जिल्ला जिल्लामा थपिने सरकारको चिन्ता रहेको छ ।
प्रतिक्रिया