काठमाडौं । डा. गोविन्द केसीको जीवन रक्षाको माग गर्दै नेपाल चिकित्सक संघ आवद्ध चिकित्सकहरुले भोलि २२ गतेबाट कोभिड १९ र आकस्मिक सेवा बाहेकका सबै सेवा बहिस्कार गर्ने घोषणा गरेका छन् । डा.गोविन्द केसीसँग वार्ता टोली गठन गर्न माग गरेको दिएको ७२ घण्टे अल्टिमेटम सकिएलगतै संघले आन्दोलनको कार्यक्रम घोषणा गरेको छ ।
भोलि २२ गते बिहान ९ देखि ११ बजेसम्म देशभरका स्वास्थ्य संस्था तथा अस्पतालहरुमा आकस्मिक र कोभिड(१९का सेवा बाहेक अन्य स्वास्थ्य सेवा बहिस्कार गर्ने र जनस्वास्थ्यका मापदण्ड तथा सामाजिक दुरी कायम गरेर धर्ना दिने कार्यक्रम तय भएको चिकित्सक संघले जनाएको छ ।
२३ गते शुक्रबारबाट देशभर आकस्मिक र कोभिड-१९का सेवा बाहेक अन्य सबै स्वास्थ्य सेवा बहिस्कार गर्ने संघले बताएको छ । कोभिड र आकस्मिक सेवामा पनि अर्को सूचना नआएसम्म कालोपट्टी बाँधेर काम गर्ने संघले जानकारी दिएको छ ।
छ बुँदे माग राख्दै डा. केसीले कर्णाली प्रदेशको जुम्लाबाट सुरु गरेको सत्याग्रहको आज २४ दिन पुगेको छ । २४ दिन पुग्दा पनि सरकारले वार्ताको पहल नगरेकाले आन्दोलनको कार्यक्रम अगाडी बढाउन बाध्य पारिएको संघले बताएको छ ।
प्रतिक्रिया