तातोपानी नाका आजबाट सुचारु हुँदै

काठमाडौं । लामो समय बन्द भएको नेपाल चीनबीचको मुख्य व्यापारिक कारोबार नाका तातापानी नाका आजबाट सञ्चालनमा आएको छ ।

२०७२ सालको भूकम्पपछि निरन्तर बन्द हुँदै आएको यो नाका केही समय अघि खुलेपनि असोज २०देखि पुनः बन्द थियो । पछिल्लो पटक कोरोना भाइरसको संक्रमण नेपालमा बढेपछि चिनियाँ अधिकारीहरुले नाका बन्द गरेका थिए । नेपालबाट सामान लाडे गर्न जाने सात जना श्रमिकमा कोरोना संक्रमण देखिएपछि नाका बन्द भएको थियो ।

तर, आज बुधबारबाट तातोपानी नाका पुनः सुचारु हुन लागेको जिल्ला प्रशासन कार्यालय सिन्धुपाल्चोकले जनाएको छ । चीनबाट आएका सामानहरु आजै साँझसम्म तातोपानी भन्सार यार्डसम्म आइपुग्ने जानकारी ल्हासास्थित नेपाली महावाणिज्य दूतावासले सिन्धुपाल्चोक प्रशासनलाई जानकारी गराएको छ ।

कोरोना संक्रमणको अवस्था नघटिसकेका कारण सुरक्षा सतर्कता अपनाउँदै नाका सञ्चालन गर्न लागिएको छ । नेपालले तयार पारेको आइसोलेसन यार्डमा चिनियाँ ट्रकले नै सामान ल्याएर छोड्ने सहमति चिनियाँ अधिकारीहरुसँग भएको छ ।

समझदारीअनुसार सामान ल्याउनका लागि नेपाली श्रमिकहरु चिनियाँ भूमिमा प्रवेश गर्नपर्दैन । दैनिक सात वटासम्म चिनियाँ कन्टेनर नेपाली भन्सास यार्डमा आउने जनाइएको छ ।