गण्डकी प्रदेशमा कोरोना संक्रमित ७ हजार नजिक, मृत्यु हुनेको संख्या ७१ पुग्यो

पोखरा । गण्डकी प्रदेशमा कोरोना संक्रमितको संख्या ६ हजार ९८० पुगेको छ ।

क्षयरोग उपचार केन्द्र पोखरामा गरिएको परीक्षणमा ३५ जनामा संक्रमण पुष्टि भएसँगै संक्रमितको संख्या झण्डै सात हजारको नजिक पुगेको हो ।

आज थपिएका मध्ये गोरखाका २५ जना रहेका छन् । म्याग्दीका ५ जना, कास्कीका ३ जना र पर्वतका २ जना रहेको गण्डकी स्वास्थ्य निर्देशनालयले जनाएको छ ।

बिहीबार थपिएका नयाँ संक्रमितहरु सबै कन्ट्याक्ट ट्रेसिङको आधारमा थपिएका हुन् ।

यसैगरी पोखरा महानगरपालिका वडा नं. १३ का ३६ वर्षीय एक महिलाको कोरोना संक्रमणकै कारण गएराति मृत्यु भएको पनि स्वास्थ्य निर्देशनालयले जनाएको छ ।
पोखरा स्वास्थ्य विज्ञान प्रतिष्ठानको आइसीयूमा उपचारका क्रममा ती महिलाको मृत्यु भएको हो ।

यससँगै गण्डकीमा कोरोना संक्रमणबाट मृत्यु हुनेको संख्या ७१ पुगेको छ ।