नेपालगन्ज । नेपाल भारत सीमाको नेपालगन्जमा एकीकृत जाँच चौकीे निर्माणको काम सुरु गरिएको छ । नेपालगन्जमा भएको शिलान्यस कार्यक्रमको भारतीय वाणिज्य तथा उद्योग मन्त्री श्री पियुष गोयल र नेपाली शहरी विकास मन्त्री श्री कृष्णगोपाल श्रेष्ठले अनलाइन समारोहमार्फत अवलोकन गरेका छन् ।
भन्सार तथा अध्यागमन सुविधालाई एउटै छाता मुनी ल्याई दुई देशबीच मालबाहक सवारी साधनको आवतजावतलाई व्यवस्थित गर्न भारत सरकारले नेपाल भारत सीमाको दुवैतर्फ एकीकृत जाँच चौकीको निर्माण गर्न सुरु गरेको हो । सीमामा एकीकृत जाँच चौकीको स्थापनाले मालवाहक सवारी साधन तथा सार्वजनिक सवारी साधनको सहज आवात जावतका लागि इम्पोर्ट एक्सपोर्ट हाण्डलिङ्ग सुविधाहरु प्राप्त हुने बिश्वास गरिएको छ ।
एकिकृत जाँच चौकीमा वेयर हाउजिङ्ग, रेफ्रिजरेटेड कार्गो सुविधा, औषधीय, बिरुवा तथा जनावर क्वारेन्टिन एरिया, सवारी चालक तथा यात्रुहरुका लागि सुविधा, सीसीटिभी र अन्य सुरक्षा उपकरण, सातै दिन चौबीसै घन्टा बिजुली ब्याकअप सुविधा, फोहोर पानी प्रशोधन सुविधा लगायतका सुविधाहरु हुनेछन् । कार्गो हाण्डलिङ्गलाई व्यवस्थित ढङ्गले अघि बढाउन यी सुविधाहरुलाई अघि सारिएकोे हो । यी सुविधाहरुको प्रयोगले आगन्तुकहरुले बेहोर्दै आएको असुविधामा कमी आउनुका साथै समयको बचत पनि हुने भारतीय राजदुतावासले प्रकाशित गरेको बिज्ञप्तीमा उल्लेख छ ।
भारत तथा नेपालका प्रधानमन्त्रीद्वयले यसअघी वीरगंज र बिराटनगरमा निर्मित एकीकृत जाँच चौकीको क्रमसः सन् २०१८ को अप्रिल र सन् २०२० को जनवरी महिनामा संयुक्त रुपमा उद्घाटन गरिसकेका छन् ।
शिलान्यास कार्यक्रमको नेपालका लागि भारतीय राजदूत विनय मोहन क्वात्रा, शहरी विकास राज्यमन्त्री रामवीर मानन्धर तथा शहरी विकास मन्त्रालयका सचिव डा. रमेश प्रसाद सिंहले पनि अवलोकन गरेका थिए । कार्यक्रममा बाँके क्षेत्र नम्बर २ का सांसद मोहम्मद इस्तियाक राई, नेपालगञ्ज उप–महानगरपालिकाका मेयर डा. धवल शमशेर राणा तथा नेपालगञ्ज परियोजना साइटका प्रतिनिधिहरुको उपस्थिति रहेको थियो ।
उक्त परियोजनाको कार्यान्वयन भारतीय कम्पनी राइट्स इन्टरनेशनल लिमिटेडको सुपरिवेक्षणमा पुणेस्थित राजदीप बिल्डकन प्राइभेट लिमिटेडले गर्ने भारतीय राजदुतावासले जनाएको छ । दुई वर्षमा सम्पन्न गर्ने लक्ष्यका साथ सुरु भएको परियोनाको लागत १४७.१२ करोड भारु रहेको बिज्ञप्तीमा उल्लेख छ ।
प्रतिक्रिया