काठमाडौं । सत्तारुढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले सचिवालय बैठकमा एकल राजनीतिक प्रस्ताव पेश गरेपछि त्यसको पक्ष विपक्षमा समर्थक नेताहरु उत्रिएका छन् ।
अर्का अध्यक्ष एवं प्रधानमन्त्री केपी शर्मा ओली निकट स्थायी कमिटी सदस्य एवं लुम्बिनी प्रदेशकामुख्यमन्त्री शंकर पोखरेलले सामाजिक सञ्जालमार्फत प्रचण्डको प्रस्तावले पार्टी एकता गम्भीर मोडमा पुगेको बताएका थिए । पोखरेललाई जवाफ फर्काउँदै उर्जा एवं सिंचाई मन्त्री वर्षमान पुनले अध्यक्ष प्रचण्डको प्रस्तावले पार्टी एकतामा नयाँ बहसको सुरुवात भएको दाबी गरेका छन् ।
सचिवालयमा प्रस्तुत गरेको एकल प्रस्ताव फिर्ता लिन मुख्यमन्त्री पोखरेलले अनुरोध गरेका थिए । तर, मन्त्री पुनले सो प्रस्तावको बचाउ गर्दै पार्टीमा हुने छलफल, बहस, अन्तर्विरोधबाट आत्तिने वा मात्तिने गर्न नहुने जिकिर गरेका छन् ।
‘पार्टी भनेको जमेको पोखरी जस्तो होइन, हिमालबाट बग्ने तीब्र बेगको नदी जस्तो हो’, पुनले लेखेका छन्, ‘पार्टीमा हुने छलफल ,बहस ,अन्तर्विरोधबाट कोही आत्तिने वा मात्तिने गर्नु जनउत्तरदायी र क्रान्तिकारी पार्टीका नेता एवं कार्यकर्ताको जिम्मेवारी हुनसक्दैन ।’
अध्यक्ष प्रचण्डले नेकपाभित्र देखिएको विवाद समधानका लागि तयार पारेको प्रस्ताव शनिबार सचिवालय सदस्यहरुलाई वितरण गरिएको थियो । प्रधानमन्त्री ओली पक्षधर नेताहरुले सचिवालय बैठक सकिए लगत्तै बालुवाटारमा बसेर प्रचण्डको प्रस्तावको खण्डन गरेका थिए ।
प्रतिक्रिया