बुटवल । नेपाली चलिचित्र ‘भाँडाकुटी’ रुपन्देहीमा छायांकन हुने भएको छ ।
किरण विकको लेखन तथा निर्देशनमा बन्न लागेको चलचित्र ‘भाँडाकुटी’ रुपन्देहीका शहरी तथा ग्रामीण क्षेत्रहरुमा निर्माण हुने फिल्म युनिटले जानकारी गराएको छ ।
दृश्यालय सिनेमा प्रालिको ब्यानरमा निर्माण हुने फिल्मका निर्देशक एवम् कलाकारहरुको सहभागितामा आइतबार बुटवलमा एक समारोहका बीच औपचारिक घोषणा गरिएको हो । चलचित्रमा मुकुन भुषाल र बेनिशा हमाललेसँगै अभिनय गर्ने भएका छन् ।
चलचित्र भाँडाकुटी आउँदो फागुनमा बुटवल, तिलोत्तमालगायत आसपासका क्षेत्रहरुमा छायांकन गरिने निर्देशक किरण बिकले जानकारी गराए । अन्तर्जातीय वैवाहिक परिवेशसहितको सामाजिक कथामा निर्माण हुन लागेको चलचित्र कलम खड्काले निर्माण गर्न लागेका हुन् ।
चलचित्र पत्रकार संघ, रुपन्देहीको आयोजनामा भएको घोषणा तथा पत्रकार भेटघाट समारोहमा निर्देशक विकले युवाहरुको समूहले सामाजिक परिवेशमा आधारित चलचित्र बनाउन लागेको बताउँदै उत्कृष्ट बन्नेमा विश्वास रहेको जनाए ।
सो अवसरमा नायक मुकुन भुषाल र नायिका बेनिशा हमालले पुरानो परम्परा र सोचलाई नयाँ पुस्ताले चलचित्रमार्फत प्रस्तुत गरिने कथाअनुसार बन्न लागेको बताउँदै आफूहरुले उत्कृष्ट प्रस्तति दिने बताइन् । फिल्ममा राजकुमार दर्जीको कोरियोग्राफ्री र भीम विकको सम्पादन रहने छ ।
फिल्ममा गोपाल आचार्य एशोसियट डाइरेक्टर रहनेछन् । करिब एक करोड रुपैयाँ लगानीमा नयाँ टिमले फिल्म भाँडाकुटी निर्माण गर्न लागेका हुन् ।
कार्यक्रम चलचित्र पत्रकार संघ, रुपन्देहीका अध्यक्ष सुमन श्रेष्ठको अध्यक्षता र सचिव मोहन न्यौपानेको सञ्चालनमा सम्पन्न भएको थियो ।
प्रतिक्रिया