काठमाडौं । जिल्ला प्रशासन कार्यालय काठमाडौंले कोरोना संक्रमण जोखिमका बीच सभा, जुलस, प्रदर्शन नगर्न आग्रह गरेको छ ।
काठमाडौं जिल्ला प्रशासनले मंगलबार विज्ञप्ति प्रकाशित गर्दै कोरोना नियन्त्रण हुने अवस्था अझै नदेखिएको भन्दै स्वास्थ्य मन्त्रालयले जारी गरेको जनस्वास्थ्यको मापदण्डलाई पालना गर्न सर्वसाधारणलाई आग्रह गरेको हो । प्रशासनले संक्रमणको अवस्थालाई भयावह बनाउने क्रियाकलाप नगर्न आग्रह गरेको छ ।
काठमाडौंमा विभिन्न नाममा निरन्तर जुलुस प्रदर्शन हुन थालेपछि जिल्ला प्रशासनले कानून पालना गर्न सम्झाएको छ । सोमबार मात्रै पूर्वराजावादीहरुको एक समुहले काठमाडौंमा प्रदर्शन गरेको थियो ।
काठमाडौं जिल्ला प्रशासनले सूचनामा भनेको छ, ‘पछिल्लो समय जिल्लामा विभिन्न माग राखी राजनैतिक तथा अन्य भिडभाडजन्य गतिविधि जस्तै सभा जुलुस प्रदर्शन र अभियान सञ्चालन गरेको भन्ने सूचना प्राप्त हुन आएको र त्यस्ता गतिविधिहरु संक्रमणको स्थितिलाई भयावह बनाउने किसिमका भएको साथै स्थानीय प्रशासन ऐन, २०२८ र संक्रामक रोग ऐन २०२० को विपरित हुने भएकाले त्यस्ता भिडभाजजन्य गतिविधिहरु नगर्न नगराउन साथै महामारी राकथाममा सहयोग पुर्याउनु हुन सबैमा जिल्ला प्रशासन कर्यालय हार्दिक अनुरोध गर्दछ ।’
अनुरोध विपरीत सभा, सम्मेलन, जुलुस गरी भीडभाड बढाएमा स्थानीय प्रशासन ऐन, २०२८ र संक्रामक रोग ऐन २०२० बमोजिम कारबाही गरिने पनि विज्ञप्तिमा उल्लेख छ ।
प्रतिक्रिया