नवलपुर । नारायणघाट-बुटवल सडक योजना (पश्चिम खण्ड) अन्तर्गत बर्दघाट-दुम्किबास-दाउन्ने सडक खण्डमा निर्माण कार्य तीव्र बनाइएका कारण रातिको समयमा सवारी आवागमनमा अस्थायी प्रतिबन्ध लगाइएको छ।
सडक विभाग, आयोजना निर्देशनालय एडिबी अन्तर्गत सञ्चालित उक्त योजनाले सार्वजनिक सूचना जारी गर्दै मौसम पूर्वानुमानअनुसार वर्षा तथा हावाहुरीको सम्भावना रहेको र सडक हिलो तथा चिप्लो बन्ने भएकाले सवारी सञ्चालन जोखिमपूर्ण हुने जनाएको छ।
सूचनाअनुसार चैत ६ गतेदेखि चैत ८ गतेसम्म राति बेलुका ७ बजेदेखि बिहान ५ बजेसम्म ठूला मालवाहक सवारीसाधनलाई पूर्ण रूपमा रोक लगाइनेछ। यस्तै, साना तथा यात्रुवाहक सवारीसाधनलाई पनि आवश्यकताका आधारमा मात्रै सञ्चालन गर्न दिइने उल्लेख छ।
विशेष गरी बर्दघाटतर्फ त्रिवेणी चोक (टिसिएन चोक) र दुम्किबास क्षेत्रमा सवारी नियन्त्रण गरिनेछ। आकस्मिक सेवा, एम्बुलेन्स, सुरक्षा निकायका सवारीलाई भने प्राथमिकता दिइने आयोजनाले जनाएको छ।
निर्माण कार्य अन्तर्गत सडक मर्मत-सम्भार तथा कल्भर्ट निर्माण भइरहेकाले वैकल्पिक मार्ग प्रयोग गर्न र ट्राफिक नियमको पूर्ण पालना गर्न चालक तथा यात्रुहरुलाई आग्रह गरिएको छ।
प्रतिक्रिया