काठमाडौं । सरकारले संघीय संसदको अधिवेशन बोलाउन ढिलाई गरिरहेका बेला सभामुख अग्निप्रसाद सापकोटाले पुस १८ गतेभित्र अधिवेशन बोलाउनै पर्ने बाध्यता रहेको बताएका छन् ।
१४औं संघीय संसद सेवा दिवसको अवसरमा आयोजित कार्यक्रममा बोल्दै सभामुख सापकोटाले जति ढिलाई गरेपनि पुष १८ गतेसम्म अधिवेशन बोलाउनुपर्ने बाध्यता रहेको जनाएका हुन् ।
संवैधानिक प्रावधान अनुसार एक अधिवेशन सकिएको ६ महिनाभित्र अर्को अधिवेशन बोलाउनैपर्ने बाध्यता रहेको छ ।सभामुख सापकोटाले अधिवेशनका लागि तयार रहन संसद सचिवालयलाई निर्देशन पनि दिएका छन् ।
कोरोना भाइरसको संक्रमणको कारण देखाउँदै सरकारले संसदको वर्षे अधिवेशन गत असारमै अन्त्य गरेको थियो । यसपटक भाइरसको संक्रमणबाट अधिवेशन प्रभावित नहोस भनेर विशेष तयारी गरेको सापकोटाले बताए ।
संविधानअनुसार संसद अधिवेशन आह्वान र अन्त्य सरकारले गर्नेगर्छ । सत्तारुढ दलभित्र विवाद चर्किएकै कारण गत असारमा समेत हतारोमा अधिवेशन अन्त्य गरेको सरकारले अहिले हिउँदे अधिवेशन आह्वान गर्न चासो नै देखाएको छैन । बरु, संसदबाट पारित गर्नुपर्ने कतिपय महत्वपूर्ण विधेयकलाई अध्यादेशमार्फत भटाभट जारी गरिरहेको छ ।
प्रतिक्रिया