काठमाडौं । निर्वाचन आयोगले आगामी बैशाखमा हुने भनिएको निर्वाचन सम्पन्न गर्न कम्तिमा आठ अर्ब खर्च लाग्ने प्रारम्भिक अनुमान गरेको छ ।
निर्वाचन खर्चबारे आयोगले आइतबार अर्थसचिवसँग गरेको छलफलका क्रममा कम्तिमा आठ अर्ब खर्च लाग्ने अनुमान निकालिएो हो ।
खर्चबारे अहिलेसम्म टुंगो नलागे पनि यसै हप्ताभित्र आंकलन टुंग्याएर अर्थमन्त्रालयलाई औपचारिक पत्र पठाउने निर्वाचन आयोगका प्रवक्ता राजकुमार श्रेष्ठले बताएका छन् ।
प्रधानमन्त्री केपी शर्मा ओलीले दुई तिहाई बहुमत प्राप्तिका लागि प्रतिनिधिसभा विघटन गरेर नयाँ निर्वाचन गर्न राष्ट्रपतिलाई सिफारिस गरेका थिए । राष्ट्रपति विद्यादेवी भण्डारीले आगामी बैशाखा १७ र २७ गते निर्वाचन मितिको घोषणा गरेकी थिइन ।
प्रतिनिधिसभा विघटन विरुद्ध सर्वोच्च अदालतमा मुद्दा विचाराधीन छ । तर, निर्वाचन आयोगले भने निर्वाचन मिति घोषणा भएपछि आफ्नो सक्रियता बढाएको छ ।
आयोगले आइतबार राजनीतिक दलहरुसँग मतदाता नामावली, मतदान केन्द्र र स्थल लगायतका विषयमा छलफल गरेको थियो । आयोगले माघ १५ गते मतदाता नामावली प्रकाशनका लागि प्रस्ताव गरेको छ ।
प्रतिक्रिया