सितलहर र चिसो बढेसँगै नेपालगन्ज र कोहलपुरका बिद्यालयहरु ३ दिनका लागि बन्द

नेपालगन्ज । अत्याधिक चिसो र लगातार सितलहर चलेपछि नेपालगन्ज र कोहलपुर नगरपालिकाले नगर क्षेत्रभित्रका सबै विद्यालय ३ दिनकालागि बन्द गर्ने निर्णय गरेको छ । नगरपालिका अन्तर्गत नगर शिक्षा शाखाले आगामी माघ २१ गते (बुधबार) सम्मकालागि सबै विद्यालय बन्द गर्न आह्वान गरेको छ । अत्याधिक चिसो बढेसँगै बालबालिकाहरुलाई जोखिमबाट बचाउन नगरक्षेत्रभित्रका सबै विद्यालय बन्द गर्न लागिएको ती नगरपालिकाले जनाएको छ ।

कोहलपुर नगरपालिकाका शिक्षा शाखा प्रमुख अनन्त कुमार पौड्यालका अनुसार नगरभित्र सञ्चालित सम्पूर्ण सामुदायिक तथा संस्थागत विद्यालय माघ १९ गते सोमबारदेखि २१ गते बुधबारसम्म बिदा गर्ने निर्णय भएको छ ।

चिसोका कारण विद्यालय जाने उमेरका बालबालिका सबैभन्दा बढि प्रभावित भएका छन् । सितलहरका कारण जनजिवन नै प्रभावित बनेपछि नगर भित्रका सबै बिद्यालय बन्द गर्ने निर्णय गरिएको नेपालगन्ज उपमहानगरपालिकाले जनाएको छ । नेपालगन्ज नगरका ३ दिनकालागि सबै विद्यालय बन्द गर्न बिद्यालय सञ्चालकहरुलाई आग्रह गरेको छ ।