काठमाडौं । आज नेपाल कम्युनिस्ट पार्टी (नेकपा) प्रचण्ड-नेपाल पक्षको केन्द्रीय कमिटी बैठक बस्दैछ ।
प्रतिनिधिसभा विघटनपछि आन्दोलित बनेको सो पक्षले आज बिहान ११ बजेका लागि काठमाडौंमा केन्द्रीय कमिटी बैठक बोलाएको हो ।
चरणवद्ध आन्दोलन गर्दै आइरहेको नेकपा प्रचण्ड-नेपाल पक्षले संसद पुनर्स्थापनाको माग राख्दै आएको छ । बैठकले आन्दोलनको समीक्षा गर्दै आगामी कार्यदिशाका बारेमा छलफल गर्ने एक नेताले बताए ।
सो पक्षले यसअघि नै बुटवल, विराटनगर र धनगढीमा तीन वटा प्रदेश स्तरीय विरोध सभा गरिसकेको छ भने जनसभा तथा भेलाहरु गर्दै आएको छ । माघ ९ गते काठमाडौं उपत्यकामा शक्ति प्रदर्शन गरेका नेकपा प्रचण्ड-नेपाल पक्षले माघ २८ गते पनि जनप्रदर्शन गर्ने घोषणा गरिसकेको छ ।
यसअघि सो पक्षको केन्द्रीय कमिटी बैठक गएको पुस ७-९ मा बसेको थियो । त्यसपछि स्थायी कमिटी बैठकमार्फत नै पार्टीको निर्णय गर्दै आएको थियो ।
प्रतिक्रिया