सुर्खेत । सरकारले घोषणा गरेको राष्ट्रिय गौरवको आयोजना मध्य एक प्रमुख भेरी(बबई डाईभर्सन बहुउद्देश्यीय आयोजनाका श्रमिकले पारिश्रमिक नपाएको भन्दै आन्दोलन थालेका छन् । उनीहरुले विगत एक वर्षदेखि पारिश्रमिक नपाएको भन्दै आन्दोलन शुरु गरेका हुन् ।
आयोजना परामर्शदाता महाव घोड्स इन एशोसियशन वीथ (इकोकोड) नेपालको तर्फबाट काम गर्ने श्रमिकले पारिश्रमिक नपाएका कारण आन्दोलन गर्नुपरेको श्रमिकहरुले बताए ।
गत असार २२ गते रोजगारदाता र श्रमिकवीच एक वर्षको बाँकी पारिश्रमिक एक महिनाभित्र भुक्तानी गर्ने मौखिक सहमति बिपरित रोजगारदाता कम्पनीले हालसम्म भुक्तानी नदिएको उनीहरुले भनाइ छ ।
आन्दोलरत श्रमिक प्रविन यादवले रोजगारदातासँग बक्यौता पारिश्रमिक दिन ६ पटकसम्म लिखित अनुरोध गर्दा समेत सुनुवाई नभएपछि आन्दोलन गर्नु परेको बताए ।
बक्यौता रकम भुक्तानी गर्ने सम्झौता गरेको पाँच महिना बितिसक्दा समेत रोजगारदाताले बेवास्ता गरेको श्रमिकहरुको भनाई छ ।
श्रमिकहरुले आयोजनाको कार्यालय अगाडि सोमबारदेखि चरणबद्ध आन्दोलन शुरु गरेका हुन् ।
आयोजनाका इञ्जिनियर प्रदिप खनालले ११ महिनासम्म पनि रकम नपाउँदा खाने बस्ने खर्च समेत नभएपछि बाध्य भएर आन्दोलनमा उत्रिनु परेको बताए । श्रमिकहरुले पहिलो चरणमा कामलाई प्रभावित नपर्ने गरि साँकेतिक आन्दोलन गरेको र माग पुरा नभएर कामकाज नै रोकिने गरि पनि आन्दोलन हुन सक्ने चेतावनी दिए ।
प्रतिक्रिया